საბჭოთა წარმოების ხელის გადასატანი ტანკსაწინააღმდეგო ყუმბარსატყორცნი РПГ-7 წარმოადგენს ერთ-ერთ ყველაზე უფრო ფართოდ გავრცელებულ იარაღს მსოფლიოში. ის ასევე არის და ერთ-ერთ ყველაზე უფრო ეფექტური ტანკსაწინააღმდეგო იარაღი თანამედროვე კონფლიქტებში. სახელწოდება РПГ რუსულად იშიფრება, როგორც Ручной Противотанковый Гранатомёт. ტანკსაწინააღმდეგო ყუმბარსატყორცნი წინმორბედი მოდელიდან – РПГ-2-დან გაუმჯობესებულ ვერსიას წარმოადგენს, რომელიც, თავის მხრივ, მეორე მსოფლიო ომის დროინდელი გერმანული ტანკსაწინააღმდეგო ყუმბარსატყორცნის, Panzerfaust-ის მიხედვით შეიქმნა.
სიმარტივემ, დაბალმა ფასმა და საკმაოდ მაღალმა ეფექტურობამ РПГ-7 ყველაზე ფართოდ გავრცელებულ ტანკსაწინააღმდეგო იარაღად აქცია. ყუმბარსატყორცნი ამჟამად ორმოცზეე მეტი სხვადასხვა ქვეყნისა არმიათა შეიარაღებაში იმყოფება. რუსეთის გარდა РПГ-7 ლიცენზიურად ცხრა უცხოური ქვეყნის მიერ იწარმოება. მათ შორის: ბულგარეთი, ჩინეთი, ერაყი, ირანი, რუმინეთი, პაკისტანი და სხვ. ტანკსაწინააღმდეგო ყუმბარსატყორცნი განსაკუთრებული პოპულარობით ტერორისტულ ორგანიზაციებსა და სხვა სახის უკანონო შეიარაღებულ გასამხედროებულ ფოფრმირებებში სარგებლობს. მისი შექმნის დღიდან РПГ-7-მა დედამიწის ყველა კონტინენტზე წარმოქმნილ თითქმის ყველა კონფლიქტსა და ომში მიიღო მონაწილეობა.
საბჭოთა კავშირის არმიის შეიარაღებაში РПГ-7-ები 1961 წელს მიიღეს, მან მოძველებული РПГ-2-ები ჩაანაცვლა. РПГ-7-ს შეუძლია გაისროლოს, როგორც სტანდარტული, ისე ტანდემური კუმულაციურქობინიანი ტანკსაწინააღმდეგო, მსხვრევად-ფუგასური და თერმობარული რეაქტიული ყუმბარები.
ყუმბარსატყორცნის გამშვები მილის კალიბრი 40 მმ-ია, ხოლო სიგრძე 95.3 სმ-ს შეადგენს. იარაღი დაახლოებით 7 კილოგრამს იწონის. გამშვები მილის შუა ნაწილზე ხე არის გადაკრული, რაც მსროლელს გასროლისას წარმოქმნილი მაღალი ტემპერატურისაგან იცავს. РПГ-7-ებს, ჩვეულებრივ, აქვთ ოპტიკური სამიზნეები, თუმცა ამის გარდა მასზე ღია ტიპის რკინის სამიზნეებიც არის დამაგრებული. მასზე ასევე შესაძლებელია დამაგრდეს პასიური ინფრაწითელი და ღამის ხედვის აპარატურებიც.  РПГ-7-ზე რეაქტიული ყუმბარა წინიდან მაგრდება, რაც საშუალებას იძლევა, რომ 40 მმ-ის კალიბრის გამშვები მილიდან გასროლილ იქნას 105 მმ კალიბრის ყუმბარებიც კი. ყუმბარსატყორცნის ყუმბარების მასა, სახებებიდან გამომდინარე, 2.5-დან 4.5 კგ-მდე მერყეობს. გასროლა დენთის მუხტის აფეთქებით ხდება, რომელიც ყუმბარას უკნიდან ეხრახნება და და გასროლისას მთლიანად იწვება და ყუმბარას საწიყის აჩქარებას ანიჭებს, რომელიც მისი ტიპიდან და მასიდან გამომდინარე 112მ/წმ-დან 140მ/წმ-მდე მერყეობს. გამშვები მილის დატოვების შემდეგ დაახლოებით 10-15 მეტრში, მას შემდეგ, რაც ის იარაღის გათვლის წევრებს უსაფრთხო მანძილზე მოშორდება, ირთვება რაკეტული ძრავა, რომელიც ყუმბარას 295 მ/წმ სიჩქარეს ანიჭებს. ყუმბარის სტაბილიზება ორი მასტაბილიზებელი ფრთის საშუალებით ხდება. РПГ-7-ის ქვეითსაწინააღმდეგო ყუმბარა დაახლოებით 1100 მეტრის ტოლი მანძილის დაფარვა შეუძლია, ხოლო ტანკსაწინააღმდეგო ყუმბარის ფრენის მაქსიმალური მანძილი 920 მეტრია და ამ მანძილის გავლას ყუმბარა 4.5 წამს ანდომებს.
ყუმბარსატყორცნის ტანკსაწინააღმდეგო ყუმბარებს: ПГ-7-ს, ПГ-7М-ს, ПГ-7Н-სა და ПГ-7ВЛ-ს დაახლოებით 600 მმ-ის სისქის მონოლითური ფოლადის ჯავშნის გარღვევა შეუძლია. იარაღის გასროლებში ასევე შედის ПГ-7ВР-ს ტიპის ტანდემური ტანკსაწინააღმდეგო კუმულაციური ყუმბარა, რომელიც დინამიკური დაცვით აღჭურვილი სამიზნეების წინააღმდეგ გამოიყენება. 
გადასატანი ტანკსაწინააღმდეგო ყუმბარსატყორცნის ეფექტური ცეცხლის მანძილი დაახლოებით 300 მეტრია მოძრავი სმიზნეების შემთხვევაში, ხოლო სტაციონარული სამიზნეების შემთხვევაში მისი სროლის ეფექტური მანძილი 500 მეტრამდე იზრდება. РПГ-7-ის შემთხვევაში ფრზა „რაც უფრო ახლოს, მით უფრო ზუსტად" ყოველთვის ჭეშმარიტებას წარმოადგნს. ავღანეთში საბჭოთა ინტერვენციისას მოჯაჰიდები ყიველთვის ცდილობდნენ РПГ-7-ები 80 მეტრზე უფრო ნაკლებ მანძილზე გამოეყენებინათ. РПГ-7-ები ვიეტნამის ომში ეფექტურად გამოიყენებოდა მსუბუქად დაჯავშნული M113-ის ტიპის ჯავშანტრანსპორტიორების წინააღმდეგ. ამ ტიპის ყუმბარსატყორცნებით აღჭურვილი ტერორისტებისაგან დაცვის მიზნით კოალიციური ძალები ერაყში ჯავშანტექნიკაზე მეტალის ცხაურებს ამაგრებენ. მეტალის ცხაურები ჯავშამანქანისკენ ნასროლი კუმულაციური ყუმბარის ამფეთქი მანამ მოჰყავს მოქმედებაში, სანამ ის უშუალოდ ჯავშანტექნიკის კორპუსს მიაღწევს. ნაადრევად წარმოქმნილი კუმულაციური ჭავლი კი ძალას კარგავს და სამხედრო ტექნიკის ძირითად ჯავშანს უმნიშვნელოდ აზიანებს.
| 
