გასული საუკუნის 80-იანი წლების მიწურულს ისრაელის თავდაცვთმა ძალებმა – ცაჰალმა – 5.56-მმ-იანი მსუბუქი ხელის ტყვიამფრქვევის შექმნის საჭიროება დაინახა. ახალ იარაღს სრულიად უნდა ჩაენაცვლებინა საიმედო, თუმცა ქვეითებისათვის საკმაოდ მძიმე 7.62-მმ-იანი FN MAG-ი ტიპის ტყვიამფრქვევები.
მიზანი იყო შეექმნათ ისეთი ტყვიამფრქვევი, რომელსაც FN Minimi-ის ტიპის მსუბუქი ტყვიამფრქვევის მსგავსი ტაქტიკურ-ტექნიკური მახასიათებლები ექნებოდა. აღნიშნული იარაღი ისრაელში გამოცდებს გადიოდა, თუმცა რამდენიმე მიზეზის გამო ისრაელის თავდაცვითი ძალების მიერ შეიარაღებაში მიღებაზე უარყოფილი იქნა.
ახალ მსუბუქ ტყიამფრქვევზე მუშაობა ებრაულმა კომპანიამ – Israeli Military Industries-მა (შემოკლებით – IMI ) დაიწყო. იარაღის პირველი პროტოტიპები ებრაული არმიის ელიტარულ ბრიგადა „გივატის" ლიმიტირებული რაოდენობით გამოსაცდელად გადასცეს. ტყვიამფრქვევის პირველი მოდელები საველე გამოცდებს 1993 წელს გადიოდა და მათ ტესტირების დროს მრავალი ნაკლი აღმოაჩნდათ. იარაღი განსაუთრებით მგრძნობიარე აღმოჩნდა ქვიშისა და მტვრის მიმართ, ასევე პრობლემები იყო ვაზნების მიწოდების სისტემაშიც. ამ პრობლემათა აღმოფხვრას სამ წელიწადზე მეტი დასჭირდა. ამის შემდეგ, დაახლოებით 1996 წლის დასაწყისში კომპანია Israeli Military Industries-მა ისრაელის არმიისათვის Negev-ის ტიპის ახალი ებრაული ტყვიამფრქვევების გადაცემა დაიწყო. იარაღის მიწოდება ნელ-ნელა მიმდინარეობდა და „ნეგევები" მხოლოდ და მხოლოდ 2002 წლისათვის გახდა მეტ-ნაკლებად სტანდარტული მსუბუქი ტყვიამფრქვევი ისრაელის არმიაში.
ახალმა ტყვიამფრქვევმა ისრაელის არმიაში საკმაოდ დიდი მოწონება დაიმსახურა და მალე ჯარისკაცების საყვარელ იარაღად იქცა. „ნეგევი", FN MAG-ისაგან განსხვავებით, ძალიან მსუბუქი ტყვიამფრქვევია, ნაკლები წონის გამო ჯარისკაცები უფრო მობილურებიც გახდნენ და ამასთანავე მის გამოყენება ერთ მებრძოლსაც საკმაოდ ადვილად და უპრობლემოდ შეუძლია.
დადებით თვისებებთან ერთად ტყვიამფრქვევს, რა თქმა უნდა, აქვს უარყოფითი მხარეებიც, ამათგან ყველაზე მნიშვნელოვანი პრობლემა არის ის, რომ ტყვიამფრქვევი ძალიან მგრძნობიარეა გაჭუჭყიანების მიმართ, რის გამოც განსაკუთრებულ მოვლასა და ხშირ წმენდას საჭიროებს. ამ მხრივ MAG-ს გაცილებით უკეთესი ამტანუნარიანობა გააჩნია.
ამავე დროს 5.56-მმ-იანი „ნეგევის" ცეცხლის ეფექტური მანძილი მნიშვნელოვნად ჩამოუვარდება 7.62-მმ-იანი ერთიან ტყვიამფრქვევების ანალოგიურ მაჩვენებელს. ფაქტი იყო, რომ ისრაელის არმია მხოლოდ „ნეგევის" იმედზე ვერ დარჩებოდა. სწორედ ამიტომ ებრაელებმა 7.62-მმ-იანი MAG-ი, 5.56-მმ-იანი „ნეგევთან" ერთად, ისრაელის არმიის შეიარაღებაში დატოვეს და პრობლემაც ამით მოაგვარეს.  ებრაულ მსუბუქ ტყვიამფრქვევ „ნეგევს" რკინის დახურული ტიპის სამიზნეები გააჩნია. წინა სამიზნის რეულირება როგორც ქარზე ისე ამაღლებაზეა შესაძლებელი, ხოლო უკანა სამიზნეს მხოლოდ ამაღლებაზე რეგულირებადი დოლურა გააჩნია, რომლის გასწორება 300-დან 1000 მეტრის დიაპაზონშია შესაძლებელი. ღამის პირობებში მოქმედებისათვის, „ნეგევი" აღჭურვილია ტრიტიუმისსინათლიანი ღამის სამიზნე მოწყობილობებით: ერთი მათგანი წინა სამიზნესთანაა დამონტაჟებული, ხოლო უკანა სამიზნესთან – ორი. გარდა ამისა, ტყვიამფრქვევს ლულის კოლოფის თავზე ასევე გააჩნია ინტეგრირებული მიმმართველები, რაც იარაღზე დღისა თუ ღამის ოპტიკური სამიზნე მოწყობილობების დამონტაჟების საშუალებას იძლევა. ტყვიამფრქვევის ლულაზე ასევე შესაძლებელია დამატებითი მიმართველების დამაგრება, რაზედაც ლაზერული მიზანმომნიშვნელის ან კოლიმატორული სამიზნის დაყენებაა შესაძლებელი.
იარაღს ვაზნების მიწოდების ორმაგი სისტემა გააჩნია – „ნეგევზე" მაგრდება როგორც 150 ან 200-ვაზნიანი ლენტი, ასევე 35 ვაზნიანი მჭიდიც. ლენტი იარაღის ზემოდან მაგრდება, როგორც მარცხენა, ისე მარჯვენა მხრიდან. ხოლო, რაც შეეხება მჭიდს, ისევე როგორც სხვა ჩვეულებრივ საიერიშო შაშხანებზე, „ნეგევზეც" ქვემოდან ყენდება. გამოუვალ მდგომარეობაში ტყვიამფრქვევზე ასევე შესაძლებელია 5.56 მილიმეტრი კალიბრის ვაზნრბზე გათვლილი „გალილის" ტიპის საიერიშო შაშხანისათვის განკუთვნილი მჭიდის მორგებაც, რომელის ტევადობაც ასევე 35 ვაზნაა. სპეციალური ადაპტორის გამოყენების შემთხვევაში კი ტყვიამფრქვევზე M16-ის 30-ვაზნიანი მჭიდებიც ყენდება. ექსტრაქცირებული მასრების გამომდევნი ფანჯარა იარაღის მარჯვენა მხარეს არის განთავსებული. 
ებრაული მსუბუქ ხელის ტყვიამფრქვევ „ნეგევის" ავტომატიკა აირდგუშის გრძელ უკუსვლაზეა დაფუძნებული. ტყვიამფრქვევს ცეცხლის წარმოება როგორც ჯერებით, ისე ერთეულოვანი გასროლებით შეუძლია. იარაღის მცველს ცეცხლის რეჟიმის გადამრთველის ფუნქციაც აქვს შეთავსებული, რის გამოც ის სამპოზიციიანია და პისტოლეტის სახელურის ზედა ნაწილში მდებარეობს.
ტყვიამფრქვევს გაზის სამოპოზიციიანი რეგულატორი გააჩნია: 1-ლი პოზიცია მაშინ გამოიყენება, როდესაც ტყვიების მიწოდება მჭიდიდან ხდება, ამ დროს იარაღის სროლის ტემპი მინიმალურია და 700 გასროლას უდრის წუთში; მე-2 პოზიციაზე ტყვიების მიწოდება ლენტიდან ხდება, თუმცა სროლის ტემპი საშუალოა და 850 გასროლამდეა წუთში; მე-3 პოზიციის შემთხვევაში ვაზნების მიწოდება ასევე ლენტიდან ხდება, ამ შემთხვევაში სროლის ტემპი მაქსიმალურია და წუთში 1000 გასროლას აღემატება.
ლულის გაგრილება ჰაერით ხდება. გადახურების შემთხვევაში ლულის გამოცვლა მარტივად და სწრაფადაა შესაძლებელი. ტყვიამფრქვევის ორი ვარიანტი არსებობს: სტანდარტული სიგრძის ლულითა და შედარებით მცირე ზომის ლულით. ლულების სიგრძეები, შესაბამისად, 460 მმ და 330 მმ-ია. შედარებით მცირე ლულის მქონე ვარიანტს „კომანდო" ეწოდება და ახლო მანძილზე, ურბანულ პირობებში ბრძოლისათვის არის განკუთვნილი.
ტყვიამფრქვევს მარჯვენა მხარს დასაკეცი მეტალის კონდახი გააჩნია. ეს კონდახი საიერიშო შაშხანა „გალილის" კონდახის მსგავსია. იარაღის ლულის ქვემოთ დამონტაჟებულია მსუბუქი, დასაკეცი და მოსახსნელი ორფეხა სადგამი. იარაღის ლულის კოლოფს ასევე გააჩნია სპეციალური მოწყობილობა, რომლის საშუალებითაც მისი მანქანებზე დამონტაჟებაა შესაძლებელი. აღსანიშნავია ის ფაქტიც, რომ თუკი ტყვიამფრქვევს მოვხსნით ორფეხა სადგამს და მასზე მჭიდს დავაყენებთ, „ნეგევი" წარმოგვიდგება როგორც ჩვეულებრივი საიერიშო შაშხანა, თუმცა, რა თქმა უნდა, სტანდარტულ შაშხანასთან შედარებით გაცილებით უფრო მძიმე.
ტყვიამფრქვევის სწრაფსროლა წუთში 700-დან 1 150 გასროლამდე მერყეობს. ეფექტური ცეცხლის წარმოების მაქსიმალური მანძილი სტანდარტულ ვერსიაზე 1 000 მეტრამდეა, ხოლო „კომანდოს" შემთხვევაში აღნიშნული მახასიათებელი 800 მეტრამდე მცირდება. სტანდარტული ვერსიის ტყვიის საწყისი სიჩქარე 915 მ/წმ-ს, ხოლო „კომანდოზე" 850 მ/წმ-ს შეადგენს. იარაღი განსაკუთრებით ეფექტურია ახლო მანძილზე, შეზღუდული სივრცის პირობებში ბრძოლისას – ტყვიამფრქვევის შედარებით დიდი მასისა და მცირეკალიბრიანი ტყვიების გამოყენების გამო მისი უკუცემა საკმაოდ მცირეა, რაც მაღალ სიზუსტეს განაპირობებს იმ შემთხვევაშიც კი, როდესაც მეტყვიამფრქვევე ფეხზე მდგომარე პოზიციიდან აწარმოებს ცეცხლს.
ტაქტიკურ-ტექნიკური მახასიათებლები:
ტიპი მსუბუქი ტყვიამფრქვევი
შექმნის ადგილი ისრაელი
შეიარაღებაში მიიღეს 1996 წელს
მწარმოებელი Israel Military Industries
წონა (სტანდარტული / კომანდო) 7.4 / 7.0 კგ
სიგრძე (სტანდარტული / კომანდო) 1 020 / 780 მმ
სიგრძე დაკეცილი კონდახით (სტანდარტული / კომანდო) 890 / 680 მმ
ლულის სიგრძე (სტანდარტული / კომანდო) 737 მმ
კალიბრი 5.56 x 45 მმ NATO
სწრაფსროლა 850 – 1 150 გასრ./წთ
ტყვიის საწყისი სიჩქარე (სტანდარტული / კომანდო) 915 / 850 მ/წმ
მჭიდის / ლენტის ტევადობა 35/ 150 ან 200 ვაზნა
სროლის ეფექტური მანძილი (სტანდარტული / კომანდო) 1 000 / 800 (მაქს)
| 
